Nú þegar sumri hallar er gaman að rifja upp það sem fram fór á Hrafnseyri á liðnu sumri. Að vanda var hápunktur sumarsins Hrafnseyrarhátíð sem haldin var á þjóðhátíðardaginn 17. júní. Hátíðarræðu dagsins flutti Ísfirðingurinn Vigdís Jakobsdóttir, listrænn stjórnandi Listahátíðar í Reykjavík.
Í ræðunni kom Vigdís víða við en beindi einkum sjónum sínum að hlutverki tungumálsins, mikilvægi þess að rækta það og efla um leið og við mætum af virðingu öllu því fólki sem flytur til Íslands og hefur annað móðurmál en íslensku:
„Margt af því fólki sem flytur til landsins kemur til að sækja í þessa orku. Annað kemur í angist á flótta undan stríði eða ógnarstjórn í heimalandi sínu. Við skulum taka á móti þeim öllum eins og við myndum vilja láta taka á móti okkur í nýju landi í sömu aðstæðum. Gott samfélag byggist upp á gagnkvæmri virðingu fyrir rótum og menningu allra.“
Þetta var hugvekjandi ræða sem vert er að hvetja lesendur síðunnar til að kynna sér.