Á þúsund ára afmæli Íslandsbyggðar 1874 afhentu Danir Íslendingum sérstaka stjórnarskrá. Með stjórnarskránni fékk Alþingi löggjafarvald með konungi og fjárforræði. Hér var fengin "trappa til að standa á" sagði Jón Sigurðsson við landa sína, en baráttan var langt frá því að vera til lykta leidd. Stjórnarskráin markar þátta skil í íslenskri sjálfstæðisbaráttu. Eftir þau þáttaskil skýrðist betur fyrir mönnum hversu þýðingarmikið starf Jón Sigurðsson hafði unnið fyrir þjóð sína. Hann var þó ekki viðstaddur þegar Danakonungur sótti Ísland heim á þjóðhátíðina á Þingvöllum. Honum var ekki boðið. Þess í stað sat hann við púlt sitt í Kaupmannahöfn og ritaði vinum og samherjum bréf með fyrirmælum og ráðleggingum.

Ævilok
Jón Sigurðsson andaðist í Kaupmannahöfn 7. desember 1879 eftir nokkurra mánaða erfið veikindi. Kona hans, Ingibjörg, sem hafði verið við sjúkrabeð manns síns, lést svo níu dögum síðar en hann. Þau hjón hvíla í kirkjugarðinum við Suðurgötu í Reykjavík.
Á silfursveig sem Íslendingar í Höfn settu á kistu Jóns stóðu þessi orð:

„Óskabarn Íslands, sómi þess, sverð og skjöldur.“

Þessi ljósmynd er tekin skömmu
eftir brúðkaup þeirra
Jóns og Ingibjargar
og er hún ein allra
elsta ljósmynd sem til
er af Íslendingum.
Á myndinni er Jón dökkur
á brún og brá, sem sjá má.
Skömmu síðar varð hann
hvíthærður og er það
ættareinkenni úr móðurætt
hans að vestan.