Munnmæli segja að Hrafn sé jarðsettur á þeim stað sem steinninn stendur, í gamla kirkjugarðinum, við hlið kirkju sinnar, sem ennþá mótar fyrir.
Þegar kemur fram á 15. öld er farið að nefna Eyri eftir Hrafni Sveinbjarnarsyni, sem talinn er fyrsti lærði læknir á Íslandi. Hrafn var goðorðsmaður og helsti höfðingi Vestfirðinga á Sturlungaöld um 1200. Forfeður hans höfðu fengist við lækningar hver fram af öðrum. Hrafn var víðförull og lagði leið sína meðal annars suður um Evrópu.
Í Salerno á Ítalíu er fyrsti læknaskóli í Evrópu, stofnaður á 9. öld og var jafnt fyrir karla sem konur. Til Salerno komu lærisveinar víða að og voru lærdómskröfur strangar og tók átta ár að ljúka prófi með fullum réttindum. Var skólinn jafnt fyrir pilta og stúlkur. Fræðimenn telja líklegt að Hrafn hafi komist í snertingu við Salernoskólann, þó ekki hafi verið staðfest að hann hafi stundað þar nám. Lítill vafi leikur þó á að hann hafi fyrstur Íslendinga leitað sér menntunar í læknislist.

Í Hrafns sögu segir svo:
"Til einskis var honum svo títt, hvorki til svefns né matar, ef sjúkir menn komu á fund hans, að eigi mundi hann þeim fyrst nokkra miskunn veita. Aldrei mat hann fjár lækning sína. Við mörgum mönnum vanheilum og félausum tók hann, þeim er þrotráða voru, og hafði með sér á sínum kostnaði, þangað til þeir voru heilir.
Eigi aðeins græddi Hrafn þá menn, er særðir voru eggbitnum sárum, heldur græddi hann mörg kynjamein þau, er menn vissu eigi, hvers háttar voru."
Mörg dæmi eru nefnd um lækningar Hrafns. Hann framkvæmdi meðal annars minni háttar uppskurði og er ekki fráleitt að ætla að fyrsta sjúkrahús landsins hafi verið í myndarlegum húsakynnum Hrafns á Eyri, þó með öðrum hætti hafi verið en tíðkast í dag.

Enn segir í Hrafns sögu:
"Alla menn lét hann flytja yfir Arnarfjörð, þá er fara vildu. Hann átti og skip á Barðaströnd. Það höfðu allir þeir er þurftu yfir Breiðafjörð. Og af slíkri rausn Hrafns var sem brú væri á hvorum tveggja firðinum fyrir hvern, er fara vildi".
Hrafn Sveinbjarnarson varð ekki gamall maður. Var hann ekki nema liðlega fertugur þegar Þorvaldur Vatnsfirðingur, frændi hans og hálfgildings fóstursonur, náði valdi á honum í þriðju aðför hans að Hrafni, eftir að hafa komið yfir Glámujökul í hríðarbyl með fjölmennan herflokk. Komust þeir kumpánar í virki Hrafns sem hann hafði látið gera um bæ sinn. Lét Þorvaldur hálshöggva velgjörðamann sinn á bæjarhlaðinu á Eyri 4. marz 1213.

Bautasteinn Hrafns Sveinbjarnarsonar